Zum Hauptinhalt springen

«Das nimm i'ren übu»

Schriftsteller Guy Krneta versuchte heute auf der Redaktion Tamedia-Redaktion live eine Geschichte zu schreiben. Hier ist das Resultat seines «teilweise gescheiterten Experiments».

Das Resultat eines Kampfes gegen die Zeit: Guy Krneta liest seine Live-Poesie-Geschichte.

Die Geschichte: «Pärsönlechs Gschpräch»

I ha gwüsst, dass si aus Hardlinere giut ir Asylpolitik. Aber chürzlech bi're begägnet bimne Kulturaalass. U mi het irritiert, dass usgrächnet di Frou, di Regierigsrätin, di Hardlinere, mi erinneret a myni Mueter. Mir hei zwöi-drü Wort gwächslet. U i bi erschtuunt gsi, wi offe si isch für myni Argumänt, im pärsönleche Gschprääch. So isch d Schwyz, han i tänkt. Im pärsönleche Gschprääch isch viu müglech. U i ha a myni Mueter müesse dänke, wo denn vietnamesischi Flüchtlinge betröjt het für ds Rote Chrütz. Wi si diräkt zum Polizeidiräkter gangen isch. U wi's ere glungen isch, Usnahme z erwürke, emu im Einzufau. U wüu mr itz scho Mau zäme gredt hei, han i tänkt, i wöu das Gschprääch wyterfüeren u ha offiziell bi ihrem Sekretär umne Termin bätte. U wüu si sogar no gwüsst, wär i bi, han i dä Termin übercho. - Mir heigen e Haubschtung, het si gseit und uf d Uhr gluegt. Näben ihren isch e Maa gsässe, dä het ds Protokoll gfüert. Was i für nes Aalige heig. - I heig kes diräkts Aalige, han i gseit, i wöu eren eifach Mau vrzeue, win i das so erläb. Win i das gsääch, wen ig i ds Usschaffigsgfängnis göng u mit de Lüt red. Was die mir vrzeui, di Lüt. I was für Bedingige die läbi. Bedingige, wo herter sygen aus d Haftbedingige für Schwärvrbrächer. U wi absurd eim dä ganz Ufwand vorchöm, für amnen Einzelnen es Exempel z schtatuiere. - Was i mr de vorschteu? Het si gseit. Öb aui eifach söui i d Schwyz yreisen u hie blybe? - Nei, han i gseit, aber me chönn ja d Frag o Mau umchehre: Was bringt di ganzi Abschreckig? Wän schreckt die ab? Mir wüsse genau, dass so und so viu Lüt sowiso wider zrüggchöme. - Drum müess me d Schrube ja aazie, het si gseit. - Aber was das bring, han i gseit, e zwöiesibezgjährige Maa us Serbie. Sit zwöievierzg Jahr ir Schwyz. Dä heig hie Frou un e behindereti Tochter. U itz wärd'r nach Serbien usgschafft. - Si kenn dä Fau nid, het si gseit. U dr Entscheid für das lig sowiso nid bi de Kantön. - En angere Fau, han i gseit, e Schurnalischt us Togo. Syg usgschafft worden u churz drufabe vrhaftet u gfouteret. Füftuusig Franke heig'r müesse zale, itz vrschteck'r sech irgendwo z Lomé. - O da drzue chönn si nüt säge, het si gseit. - Aber i frag mi eifach, han i gseit, was dr Sinn syg vo däm Ganze. Wen i dänk, wi me synerzyt byschpiuswys mit den Ungaren umgange syg, de Flüchtlingen us dr Tschechoslowakei, de Vietnamese. Nach hütige Kriterie chönnte ganz viu vo dene doch gar nümm yreise. - Auso das syg sehr lang här, het si gseit. - Aber me heig doch denn keni schlächten Erfahrige drmit gmacht, denn, han i gseit. - We's Rächt syg, het si gseit, würd si das Gschprääch itz hie gärn beände. Si vrschtöng, dass i es Aalige heig. Mir chönni das hie nid zäme löse. - Dr Protokollant het sy Schtift wägggleit. - E Hardlinere isch si vilech nid, han i tänkt, won i're d Hang gä ha, emu im diräkte Gschpräch. Aber dass usgrächnet die mi a myni Mueter mues erinnere, nimm i'ren übu.

Um diesen Artikel vollständig lesen zu können, benötigen Sie ein Abo.