«Äs isch dr Hammer»
Interaktiv-Box
Artikel zum Thema
Stichworte
Etwas gesehen, etwas geschehen?
Haben Sie etwas Aussergewöhnliches gesehen, fotografiert oder gefilmt? Ist Ihnen etwas bekannt, das die Leserinnen und Leser von Bernerzeitung.ch/Newsnet wissen sollten? Senden Sie uns Ihr Bild, Ihr Video, Ihre Information per MMS an 4488 (CHF 0.70 pro MMS). 
Die Publikation eines exklusiven Leserreporter-Inhalts mit hohem Nachrichtenwert honoriert die Redaktion mit 50 Franken. Mehr...
Für den musikalischen Rahmen sorgte die Guggenmusik Säins Tschikken aus Uetendorf.
Schnitzelbank Glögglifrösche
1. U-17 Fussballweltmeister
Mit Stolz han ig die Mannschaft gseh, wo Wältmeister isch wordä und sofort han ig dänkt, är Tochter muesch so einä bsorgä Doch Schock, die seit, du spinnsch, dä wird ja all Jahr numä älter Die z’Ghana blibä sicher fasch zäh Jahr im glichä Alter
2. Rudolf Merz bei Gaddafi
Dr Merzli het im Maage vom Gaddafi d‘Calmy troffe Sie seit entsetzt, jetzt het dä Schurk üs obe n‘abe gsoffe Dr Ruedi meint, das weiss ig nid, da chasch du no chlei hoffe bi mir isch so i bi bis jetzt vo hinger inegschloffe.
3. BMW-Sauber
Wär chouft, dä chouft, doch chouft dä würkli verchouft isch nid verchouft doch gloub mr fasch, dä gloubt üs nid mir hei doch fescht dragloubt so ähnlich töhnt’s, wenn Dütschi schnure das gloubä mir nur hauber doch äntlech si mr die jetzt los und d’Lösig, die isch SAUBER.
4. Wettskandal im Fussball
Dä Schnitzelbank, dä isch so alt, dä chunt fasch jedes Jahr Dr Bank vo värn, dä wird ufgmotzt es wächslet nur dr Star Mir wettä jetz um Gäld und setze dir sit doch nid erstuhnt isch‘s nid von Allme blibt nur eis es isch dr FC Thun.
5. Berlusconi mit blutiger Schnurre
Weib Wein Gesang und süsch Skandal, das isch sis Hobby gsy Gsetz verträiä, Richter schmierä Gäld wäsche muess ou si Doch d’s Lifting chunt ganz unverhofft, ou wenn er gar nit wett Jetzt steut euch vor, dr Dom vo Mailand hät es Minarett!
6. Über alles kann man abstimmen Was üs nid passt, das schaffe mir per Volksabstimmig ab Derzue bruchsch nur paar Unterschrifte schoo stimmsch drüber ab Stört dy dr Rouch oder dr Gsang vom Minarett am Morge Mir chönt ja ou dr Gmeindrat z‘Thun per Abstimmig entsorge.
7. Die Schule brennt
Hurra, hurra die Schule brennt, das freut doch jedes Chind Morn sig kei Schuel - frei hei sie jetzt und loufe wie der Wind Warum het‘s brönnt und wär isch tschuld, das frage mir üs haut Die Chind, die stressä d’Lehrer z’fescht drumm hei sie gäng Burnout.
8. Naktwandern in den Bergen
Ä neui Mode isch jetzt in, wo Gmüeter tuet erhitzä Weme i de Bärge louft ja da tuet me ou schwitze Wie lang geit‘s no, bis das ir Stadt ou so chasch d’Lüt ga blitze Nei, stell dir vor, morn gsehsch de so dr von Allme am Flitze
9. Jedä Rappä zeut
Mir fröie üs in Bundes Bärn, da git‘s es neus Wahrzeiche Jetzt chöi diä Bärä mit viu Platz i d‘Aare abe seiche Dr Seich het nur d’Frou Rytz die sucht jetzt Gäld, denn nur das zellt Im Glashuus singt sie jetzt ganz fescht ja jedä Rappe zellt
10. Minarett-Initiative
Jedä cha sich hüt ja eifach so la imigrierä Da stunsch, das sich die Meinig när äso tuet mobilisierä De chunt es Volksbegähre nid so wie dänkt jedermann So git‘s nur eis, wo mir Öich säge MinaRETTE sich wer kann.
11. Krankenkasse schlägt auf
Ä Grippewälle het jetzt d’Schwiiz ganz unverhofft erreicht Die meischtä wo de ghofft hätsch hets doch leider nidmal breicht ir Chrankekassä klafft es Loch und üs geit‘s drum jetzt schitter Dr Couchepin si mir jetzt zwar los doch Prämie stigä witer.
12. Gaddafi
Chranki Lüt, die git‘s ja viel, da muesch du gar nid paff si So einä git‘s, dir gloubet‘s nid dä heisst sogar Gaddafi Das isch ou dä, wo sich würdi vom GPS la blände Im Gotthardtunnu wär mr froh wenn’s seit, muesch sofort wändä.
13. Hirschmann und Tiger Woods
Dr Hirschmann und dr Tiger Woods ja, die hei ä so Gschichte und chunt die Gschicht mal ir dr Press, de chasch se nüm vernichte Da gsehsch, wie schnäll i Grabe gheisch das isch de gar nid schwär und bisch mal dunger, ja da stunsch da steit vor dir ä Bär.
14. Feuerwehr Murten
Es Gstürm, das git‘s ir Politik, da muess me recherchiere Zum Isatz chunt ä gschidä Maa - dä söt das revidierä Dr Gmeindrat z’Murte interpretiert - und macht das no vil dümmer Nur so chöi mir dä Seich verstah - denn jetz muess gah dr Münger
Schnitzelbank Ds' Muulbeeri
1. Ghadaffi’s Sohn – der Hannibal dä isch erzoga – ganz très mal Sie’s grossa Hobby isch – verhaua aber leider - immer Fraua Sie Vater zum Trost frisst Süasses – dahei sie Liablingstäfeli heisst – «Nimm 2»
Referain: Ei du schöna, ei du schöna...Schnitzelbank
2. D’Calmyrai trait – im Iran A Schleier - wiena Taliban Bim Dinner hät sie ds’Gsicht denn - zeigt Sind alli grad in Ohnmacht - keit Ds’Muulbeeri findet dä Schleier – guat No besser wär – sie näm der Huat
3. As Bier ir Bar – verlürt si Reiz Bisch bald meh duss – als in der Beiz Als Raucher bisch - a Schwärverbrecher wenn dinna verlangsch – an Aeschabecher Miar Drei sind leschthin - dussa g’sässa Will miar hend wella – a Rauchwurscht ässa
4. Häsch Rendezvous im Thunerhof parkiarsch im Kursaal - das isch de doof Witsch Du ad Seespiel – mit em Bus gits Park and Ride – ir Kaserna duss Bim nöchsta Alass - das tüand miar verbürga Parkiarsch di Kara – im Friedhof ar Gürba
5. Dia sind doch nett - dia Minarett au wenn der Schwyzer – keini wett Der Bundesrot - das ka nid sii dass er isch so - nebem Volk verbii Thun brucht kai sona neua - Koloss Miar hend scho 4 – luag ufa zum Schloss
6. Niemer weiss - ob ds’ Impfa nützt d’Hauptsach d’Pharma - dia macht Stütz D’Säuligrippa scho lang - im Westa Tuat Europa voll - verpeschta. Doch üs ir Schwyz – tuat das nit störa Will miar no nit – zu Europa ghöra.
7. Ma ghöri nid – zum Oberland Das findend miar – scho allerhand As Logo für Thun – das isch nid eifach Seldvilla schrieba – kasch au nid eifach Im Logo vor Stadt – das wär der Wahn A ganz a kliena – schwarza Schwan
8. Novartis Chef – hät schwätza wella Im Vatikan – uf der Radiowella Der Papst hät das aber – gar nid wella er seit em nur – „Verhüatigsvasella“ Vor vielna Johr - do häti me sölla Dia Pilla verschrieba – der Mamma Vasella.
9. Polanski früaner – s’ isch gar nid luschtig machend jungi Maitli - gluschtig Me tät na gschieder i Landdienst - stecka als im Chalet ds’Gstaad - verstecka Bim melcha im Stall – do träf er d’Miss Schweiz Ufem Puurakalender - das hät au si Reiz.
10. Thun brucht a neua Chef – vor Stadt A Frau am Stür – wär au sauglatt Sie will - will nid will sie? - wer nid ? ds’Muulbeeri denkt – und macht a Wett dia bliebt doch liaber – im Happy Bett
11. D’U 17 zeigts im letschta - Johr sind Weltmeister worda - das isch wohr die Grosse flügend nach – Südafrika und wend die Andere am Seil – abela doch das isch gar nid so – banal für das do brucht’s – e Wettskandal
12. Er singt so schön - ins Mikrofon Doch leider a bizeli - monoton Er macht a CD – Papst Benedikt will umsverrecka – landa a Hit Will er halt singt – mit sina Dritta Kai Chance gega – Oesch’s dia Dritta
Rätschbäse-Schnitzelbänk
Am Wanderwäg, grad ume Rank, Bim Ussichtspunkt da schteit e Bank. Däm Bank si Lähne isch beschriftet, Chasch läse, wär dä Bank het gschtiftet. U das macht jedem Bänker Schiss, Das isch dr Tod - vom Bankgheimnis.
Chuum isch dr Ueli Muurer gwählt, Wott är die bescht’ Armee vor Wält. Mit neue Flüger het er’s schwär, Im Bundeshuus isch d ’Kasse läär. Ir Beiz dänkt Muurer bim ne Jass: Itz chouf’ ig halt - d’ Securitas
D Stadt Thun strängt sech mächtig a, Meh usswärtig Bsuecher z'ha. Bärge, Schloss, e schöne See Chasch a vielne Orte gseh. Doch nume z' Thun git's für Tourischte Es "Bed&Breakfast" - i dr Chischte.
D' Hunde-WC si verschwunde, Wo n er wott, - darf Bäri pfunde. «Herrchen» muess jetz sälber putze, Überall stöh grüeni Chrutze. Thun isch im Reisekatalog Die grüenschti Stadt - dank Robidog.
Im BAG tüe d'Scheffe schimpfe, Wil sech d'Lüt nid wei la impfe. Mir verstöh d' Ablehnig schwärlech, D' Schweinegrippe isch sougfährlech: Wär sech nid impft, dä überchunnt se, U wär se het, - dä ghört me grunze
Viel Erger g'äh het jahrelang Im Schwäbis dr Bahnübergang. Doch itz isch fertig reklamiert, Me het die Schanze usplaniert. Chuum het me d'Auto düreglah, So muess me nomal vor afah.
Von Allme isch lang Stapi gsy, D’ Frou Haller überall drby. Dr Siegethaler kennt me o, D’ Jolanda Moser sowieso Als Scheffi vo de Strassewüscher. - Doch wär weiss öppis vom Herr Lüscher?
Geisch mal wieder mit dim Schatz Im Usgang ufe Mühliplatz. Viel tüe dert - statt Ornig ha - Dräck u Chaos hinderlah. We's ringsum usgseht wie ne Sou Heisst das uf Nöidütsch - "pray4snow".
Dr Thunpriis isch e grossi Ehr, Wär überchunnt dä Orde - wär? Dä müesst e Mönsch verdienet ha, Wo luter Guets für Thun het ta. Doch d' Jury diskutiert nid lang U git dä Priis - em Ziegler Schang.
Machsch e Schritt - u no ne Schritt, Am Uferwäg nah - s isch e Hit. No ne Schritt - u no ne Schritt, Vom Bahnhof wägg bisch no nid wyt, No lang bisch nid am See ytroffe, U scho hesch e Million abgloffe.
Darfsch nümme rouke i dr Beiz, Oh Stammtisch, wo blybt da di Reiz! D’ Äschebächer muesch verschrotte. Glii wird o no ds Bier verbotte. U so besiglet d’ Diktatur Dr Undergang - vor Volkskultur.
Thun suecht e nöie Bürgermeischter, Im Renne stöh paar wachi Geischter. Wär gwinnt die Wahl, - Frou oder Maa? Itz loset,- wie mir’s wette ha: I ds Rathuus ghört e gwitzte Schädu Drum wähle mir – dr Mokka-Pädu. (Thuner Tagblatt)
Erstellt: 18.02.2010, 14:29 Uhr
